இறைவனிடம் கையேந்தினேன்...

எங்கள் குடியிருப்பில் 4 மிகப் பெரிய (3 மே ஃபிளவர் ஒரு வேம்பு) மரங்களை வரும் 6ஆம் தேதி இல் இருந்து ஆரம்பித்த மூன்று நாட்களுக்கு வெட்டி விடப் போகிறார்கள். இரண்டு வருடங்களுக்கு முன்பே இதற்கு நட்பாகவே எதிர்ப்பு தெரிவித்தேன்.அது கட்டிடத்தின் மீது சாய்ந்து விடும் என்றெல்லாம் கூறினார்கள் அதற்கெல்லாம் வாய்ப்பே இல்லை. நிறைய இடைவெளி இருக்கிறது.

இன்று சுற்றறிக்கை அனுப்பி கையெழுத்து போடுமாறு கேட்டபோதும் வேண்டாம் கிளைகளை தரித்து விடுங்கள் மரத்தை வெட்ட வேண்டாம் என்று ஆங்கிலத்தில் எழுதி கையெழுத்திட்டு அனுப்பினேன்.

இருந்தாலும் 2 மணி நேரம் கழித்து வாட்ஸ்அப் குரூப்பில் (அட்மின் மட்டுமே பதி விடுவார் ) அனைவரும் வாகனங்களை வேறு இடத்தில் மாற்றி அந்த மூன்று நாட்கள் நிறுத்திக்கொள்ளுங்கள் மரங்களை வெட்ட முடிவு செய்யப்பட்டிருக்கிறது என்று அட்மின் அறிவித்துவிட்டார்

மிகுந்த மன உளைச்சல். நான் சொல்வதைக் கேட்பார்கள் கேட்கவில்லை என்ற ஈகோ எல்லாம் இல்லை.

இருபது வருடங்களாக நாங்கள் பார்த்து வந்த மரங்களை வெட்டி வீழ்த்துவது என்பது என்னால் கண் கொண்டு பார்க்க முடியுமா என்று தெரியவில்லை.அழகாக வரிசையாக அமைந்த மரங்கள் கண்கொள்ளாக் காட்சியாக இருக்கும். ஆயிரம் ஆயிரம் பறவைகள் கூடுகள் எப்போதும் ஒலிக்கும் பறவையின் குரல்….இனி எங்கள் குடியிருப்பு ஒரு கான்கிரீட் காடு.

கண்கலங்கி கொண்டிருக்கிறேன். தொண்டை அடைக்க..

பிளாட் ஓனர்ஸ் 15 பேர்தான் இருக்கிறோம்.அதில் ஒரு நாலைந்து பேர் மட்டுமே அந்த இடத்தில் வேறு மரம் வைத்துக் கொள்ள வேண்டும் (subject to replacement)என்று கருத்திட்டு இருந்தார்கள். பிறர் கையெழுத்து போட்டுவிட்டார்கள்.

முறையாக அரசு அனுமதி பெறவில்லை. Revenue துறையில் தகவல் தெரிவிக்கவில்லை. ஆனால் என்னால் புகார் எல்லாம் அளிக்க முடியாது. காரணம் இதில் எனக்கு சப்போர்ட் செய்ய ஆள் பலம் இல்லை. மீறி ஏதாவது செய்தால் மிரட்டல் வரலாம். எதுவும் நடக்கலாம். கையறுநிலை

இறைவன் நேரில் வந்தால் எப்படியாவது இந்த செயலை தடுத்துவிடும் என்று கேட்பேன். வேறு வழி இல்லை.

மரங்களுக்கு பின்னால் தெரிவது அடுத்த கட்டிடம். அந்த சுவர் எங்கள் காம்பவுண்ட் சுவர். காருக்கு பக்கத்தில் தெரிவது எங்கள் செக்யூரிட்டி நிற்குமிடம்.

04.10.2021

இன்றைய தேதி மரங்களுக்கு மரணதண்டனை குறிக்கப்பட்ட நாள். ஆறாம் தேதி

நெஞ்சம் துடிதுடிக்க எந்த சத்தம் கேட்டாலும் மரம் வெட்டும் வேலையை துவக்கி விட்டார்களோ என்று பதட்டத்துடனே வேலைகளை செய்துகொண்டிருந்தேன்.

ஆனால் ஒன்றும் நடக்கவில்லை.

இரவில் சில நண்பர்களுடன் நல்ல வேளையாக எதுவும் நடக்கவில்லை என்று பேசிக்கொண்டிருந்தோம்.

மரங்கள் பிழைத்துக் கொண்டன என்று சிரித்தோம்.

நவராத்திரி என்பதால் தசரா பண்டிகையை முன்னிட்டு மரம் வெட்டுவதை ஒத்திப் போட்டு இருப்பார்களோ என்ற சந்தேகமும் இருந்தது.

தேதி 7.

இன்று ஆட்கள் வந்து விட்டார்கள்.

மரங்களின் மரணம் உறுதியாகிவிட்டது.

மரங்களைப் பிளக்க ஆரம்பித்தார்கள்.

நெஞ்சில் படபடப்பு. வெளியே செல்ல வேண்டிய வேலை. ஒருவரின் மேற்பார்வையில் கிளைகள் வெட்டப்பட்டுக் கொண்டிருந்தன.

படம் எடுத்தால் அவர் பிரச்சினை செய்யலாம் என்ற சந்தேகத்தில் உயிருக்கு பயந்து அங்கிருந்து வேகமாக சென்று விட்டேன்.

மத்தியானம் திரும்பி வரும்போது வண்டியினுள் அமர்ந்து கொண்டே இந்தப் படத்தை  எடுத்தேன். மனசு கனத்தது

இனி எதுவும் செய்வதற்கில்லை.

நெஞ்சம் படபடத்தது. உடல் வேர்த்தது.

இறைவனிடம் மீண்டும் கையேந்தினேன்.

தவிர்க்கமுடியாததைத் தாங்கிக் கொள்ளும் சக்தியை கொடு...

இன்று தேதி 8.

 மரங்கள் முற்றிலுமாக வேரறு க்கப்பட்டன. மரணதண்டனை நிறைவேற்றப்பட்ட மரங்களைக் கண்டு கண்ணீர் வடிக்கும் சக்தி கூட எனக்கு இல்லை.

கதவை சாத்திக்கொண்டு வீட்டில் நாள் முழுவதும் அமர்ந்திருக்கிறேன்.

மனத்தை எவ்வளவுதான் மாற்றிக் கொள்ள முயன்றாலும் முடியவில்லை என்பதே உண்மை. நண்பர்களிடம் அரட்டை அடிக்க முடியாது என்று கூறிவிட்டேன்.

மரத்தை வெட்டும் இயந்திரத்தின் விர்...ர்...ர்... 

காதுகளில் அமிலத்தைக் காய்ச்சி ஊற்றியது போல்..

இதயம் வரை சென்று வலியை உணர்த்தியது.

மாடியில் இருந்த பதின் பருவத்தினன் ஒருவன் காட்சிகளைப் படமெடுத்து அழுதுகொண்டே ஸ்டேட்டஸ் போட்டு இருந்தான்.

இன்னும் ஒன்றே ஒன்று மிச்சமிருக்கிறது.

 நொடிகளில் அதுவும் வீழ்த்தப்பட்டது.

இதோ சுமந்து செல்ல வாகனம் வந்துவிட்டது.

மொட்டை மாடியில் இருந்து படம் தான் எடுக்க முடியும்.

மரங்களின் மரண ஊர்வலம் நடந்தேறியது.

நெஞ்சு பொறுக்குதில்லையே இந்த நிலைகெட்ட மாந்தரை நினைந்துவிட்டால்...

காற்று மாசு சுற்றுச்சூழல் சீர்கேடு இயற்கையை பாதுகாத்து வருங்கால சந்ததிக்கு வழங்குவது என்பதெல்லாம் ஏட்டளவில் தான் வெறும் வாய்ப்பேச்சு தானா?

நாங்கள் எல்லாம்  தமிழ் வாழ்க கைகட்டி வேடிக்கை பார்த்து பெருமூச்சு விட்டு கண்கலங்கி நிற்க மட்டும் தானா?

இதோ நேற்றும் இன்றும் எடுத்த இரு படங்கள் (7 மற்றும் 8 தேதி) 

அடுத்த கட்டிடத்தில் இருந்து ஆதங்கத்துடன் வேடிக்கை பார்த்தார்கள். காம்பவுண்டுக்கு உள்ளேயிருந்து நாங்களும் கைகட்டி மௌனமாக ...

10.08.2021 

இன்று மயான அமைதி.

இத்தனை நாட்கள் கீச்சிட்ட பறவைகள் அனைத்தும் பறந்தோடி விட்டதால்.

இட ஒதுக்கீடு

அரசு பணிகளில் பெண்களுக்கு இட ஒதுக்கீடு 30% லிருந்து 40% ஆகத்தானே அதிகரித்து உள்ளார்கள். 50% கொடுத்திருந்தால் தானே சம உரிமை நிலைநாட்டப்பட்டிருக்கும். 40% கொடுத்ததற்கே சில ஆண்கள் பொங்குவது ஏன்?

பெண்களுக்கு ஏற்கனவே இருந்த முன்னுரிமை தான் 30 %. அது இப்போது 40 % ஆக உயர்த்தப்பட்டுள்ளது.

குறிப்பிட்டவர்களுக்கு எத்தனை விழுக்காடு என்பதை எப்படி பொருள் கொள்ள வேண்டும் .

Gender equality அல்லது ஒடுக்கப்பட்டவர்களுக்கான சம உரிமை இதன் மூலம் நிலைநாட்டப்படுவது எப்படி என்று பார்க்கலாம்.

இப்போது அந்த 40 விழுக்காடு

(எடுத்துக்காட்டாக 40 காலி இடங்கள் என்று வைத்துக்கொள்வோம்)பெண்களுக்கே போய்விட்டால் மீதமுள்ள 60 காலியிடங்களுக்கு மட்டுமே ஆண்கள் போட்டியிட முடியும்.

ஆனால் பெண்கள் அந்த நூறு இடங்களுக்கும் போட்டியிடலாம். 40 இடங்கள் சிறப்பாக அவர்களுக்கு மட்டுமே. மீதமுள்ள 60 இடங்களுக்கு அவர்கள் ஆண்களோடு போட்டியிட வேண்டும். Merit will be the criterion in that.

"""""""""""""""""""”"""""""""""""""""""""""""""""""""""""""""""""""""""""""""""""""""""""

இப்போது பொதுவாக ரிசர்வேஷன் பாலிசி என்பதைப்பற்றி கூற வேண்டிய அவசியம் வருகிறது.

இதுவே Reservation policy.( பொதுவாகவே இட ஒதுக்கீடு என்பது இப்படித்தான் பின்பற்றப்படுகிறது)

(60% என்பது இட ஒதுக்கீட்டுக்கான இந்திய சட்டத்தில் உச்சவரம்பு 50% மட்டுமே சாதி அடிப்படையில் ஆனது)

எடுத்துக்காட்டாக மலைவாழ் மக்களுக்கான (ST) இட ஒதுக்கீடு அவர்கள் பொது (General category)என்ற வகையிலும் போட்டியிடுவதைத் தடுக்காது. அதேசமயம் அவர்களுக்கான அந்த ஒதுக்கப்பட்ட காலியிடங்களை வேறுயாரும் பெற முடியாது.

போட்டியிடுவதற்கு விண்ணப்பங்களே பட்டியலின மலைவாழ் மக்களிடம்(ST) இருந்து இருந்து வரவில்லை என்றால் அந்த காலி இடங்கள் நிரப்பப்படாமல் வைக்கப்பட்டு நிரப்பப்படாத முன்பதிவு காலியிடங்கள் அடுத்த ஆண்டுக்கு முன்னெடுக்கப்படும்.

3 வருடங்களுக்குப் பிறகும் முதல் ஆண்டு நிரப்பப்படாத காலியிடங்கள் இருந்தால், அந்த நிரப்பப்படாத காலியிடங்கள் 4 வது ஆண்டில் பேக்லாக்(Backlog vacancies) காலியிடங்களாக மாறும், மேலும் இதுபோன்ற பேக்லாக் காலியிடங்களை நிரப்புவதற்கான கூடுதல் தளர்வுடன் ஸ்பெஷல் டிரைவ் அறிவிக்கப்படும்.

ஒரு பிரிவில் நிரப்பப்படாத காலியிடங்கள் ஒரே வகையால் மட்டுமே நிரப்பப்பட வேண்டும். மற்ற பிரிவுகளில் காலியிடங்களை சேர்க்க முடியாது.

பொருளாதார ரீதியில் நலிவடைந்த மக்களுக்கான சம உரிமை வேண்டி இந்த இட ஒதுக்கீடு கொள்கை ECONOMICALLY WEAKER SECTIONS) வரையறுக்கப்பட்டிருக்கிறது. EWS என்ற அந்த கடைசி category.(2019 ல் மசோதா 103வது சட்டத்திருத்தம் நிறைவேற்றம்). [1]

அவ்வாறு நலிவடைந்தவர்கள் யார் என்பதை மத்திய அரசு தீர்மானிப்பதில் நடைமுறை சிக்கல்கள் இருப்பதால் அதனை மாநில அரசுகள் முடிவு செய்ய வேண்டும் என்பது மத்திய அரசின் நிலைப்பாடு.

சாதி அடிப்படையிலான இட ஒதுக்கீடு தவிர இந்த நலிவடைந்த மக்கள் யார் என்பதில் தான் இப்போது பெண்களை கருத்தில் கொண்டு அவர்களுக்கு எவ்வளவு விழுக்காடு முன்னுரிமை கொடுக்க வேண்டும் என்பதை மாநில அரசுகள் தீர்மானிக்கிறார்கள்.[2]

தமிழ்நாட்டில் மொத்தமாக அரசு பணிகளில் எத்தனை பேர் இருக்கிறார்கள் என்பதை கணக்கில் எடுத்துக்கொண்டு அவர்களில் எவ்வளவு பேர் பெண்கள் எவ்வளவு ஆண்கள் என்று கணக்கீடு செய்யப்பட்டது. அவ்வாறு 2017–2018 வரையிலான கணக்கின் படி

8.8 இலட்ச அரசு ஊழியர்களில் 2.92 இலட்சம் மட்டுமே பெண்கள். அதாவது 33% மட்டுமே பெண் ஊழியர்கள். (67% ஆண்கள்)

பெண்களுக்கு அதிக இடங்கள் ஒதுக்கப் பட்டால் அவர்கள் பணிக்கு வருவது அதிகமாகும். பொதுவில் ஆண்களுடன் போட்டியிட்டு வருவது என்பது எளிதில்லை என்ற நிலையில் அவர்களுக்கு முன்னுரிமை கொடுக்க வேண்டியது முக்கியமாகிறது.

எனவே ஏற்கனவே இருந்த 30 விழுக்காடு இடங்கள் இப்போது 40 விழுக்காடு என்று அறிவிக்கப்பட்டு இந்த ஏற்றத்தாழ்வை சமன் செய்யும் முயற்சி முன்னெடுக்கப்பட்டுள்ளது.

ஏற்கனவே தெலுங்கானாவில் 33.3விழுக்காடு இடங்கள் பெண்களுக்காக ஒதுக்கப்பட்டு கடந்த ஆகஸ்ட் மாதம் அறிவிக்கப்பட்டது.

இப்போது தமிழ்நாட்டில் 40 விழுக்காடு அறிவிக்கப்பட்டிருக்கிறது.

இதில் SC, ST, மற்றும் OBC வகைகளை சேர்ந்தவர்களுக்கான காலியிடங்கள் எந்த விதத்திலும் பாதிக்கப்படப் போவதில்லை.(Reservation)

அதேபோல் பொது என்ற category யிலும் அந்த 40 விழுக்காடு தொடர்ந்து காலியிடங்கள் அறிவிக்கப்படும்.

எப்போதுமே பலரின் சந்தேகம் என்னவென்றால் அனைத்து எஸ்சி எஸ்டி ஓபிசி மற்றும் பொது வகைகளிலும் பெண்கள் உள்ளனர். எனவே பெண்கள் அந்தந்த ரிசர்வேஷன் ல் போட்டியிடும் போது பெண்களுக்கு தனியாக ரிசர்வேஷன் ஏன் என்று கேட்டார்கள் இப்போது அதனை ஏன் உயர்த்த வேண்டும் என்று கேட்கிறார்கள்.

சாதி அடிப்படையில் பட்டியலின, மலைவாழ், பிற்படுத்தப்பட்ட மக்களுக்கு கொடுத்தது போக அனைத்துபெண்களுக்கும் கொடுத்துவிட்டால் பிற ஆண்களுக்குரிய வாய்ப்புகள் பாதிக்கப்படும் என்ற அச்சத்தில் கேள்வி எழுப்பியுள்ளனர்.

ஒட்டுமொத்த ரிசர்வேஷன் 60% போக மீதமுள்ள அந்த 40 விழுக்காடு பொது .. அதில் merit அடிப்படையில்தான் பணியிடங்கள் காலி இடங்கள் கல்வி வேலைவாய்ப்பு அனைத்தும் வழங்கப்படும். அதன் கீழ், கல்வி வயது தகுதியுள்ள எல்லோரும்போட்டியிடலாம். அதில் எந்த மாற்றமும் இல்லை. எந்த பாதிப்பும் இல்லை.

இந்த ரிசர்வேஷன் பாலிசி யிலேயே எப்போதுமே சில குறைபாடுகள்(anamolies) உண்டு. அவற்றை அவ்வப்போது ஆராய்ந்து தீர்க்க முயற்சிகள் எப்போதுமே நடந்து வந்திருக்கின்றன.

யாருக்கு முன்னுரிமை எந்த வரிசையில் என்று மேலோட்டமாகப் பார்க்கும்போது முதலில் பெண்கள் பிறகு தாழ்த்தப்பட்ட பெண்கள் பிறகு தாழ்த்தப்பட்ட ஆண்கள். பிறகு பிற்படுத்தப்பட்ட பெண்கள் பிறகு பிற்படுத்தப்பட்ட ஆண்கள் அதன்பிறகு பொது என்ற அடிப்படையில் வரும் பெண்கள் கடைசியில் மீதம் உள்ள ஆண்கள் என்று எடுத்துக் கொள்வதா என்ற கேள்விகள் எல்லாம் எப்போதுமே இருந்து வந்திருக்கின்றன.

இவற்றிற்கெல்லாம் விடை காண வேண்டுமென்றால் மக்கள் தொகை கணக்கெடுப்பு அதில் அரசு வேலையில், கல்வி இருக்கைகளில் ஏற்கனவே உள்ளவர்களின் கணக்கெடுப்பு இவற்றின் நிலவரம் கருத்தில் கொள்ளப்பட வேண்டும். அதனடிப்படையிலேயே ரிசர்வேஷன் பாலிசி செயல்படுத்தப்பட்டு வருகிறது. அவ்வப்போது சில மாற்றங்கள் தேவைக்கேற்ப செய்யப்படுகின்றன.

சம உரிமை என்பது எல்லோருக்கும் வழங்கப்படவேண்டும் என்பதே அரசியலமைப்பின் (constitution)அடிப்படை.

அவ்வாறு தான் பெண்களின் முன்னேற்றம் கருதி முப்பதிலிருந்து நாற்பது ஆக பெண்களுக்கான இட ஒதுக்கீடு அறிவிக்கப்பட்டு இருப்பதாக தமிழக அரசு தரப்பில் தெரிவிக்கப்பட்டுள்ளது.

அண்மையில் பெருந்தொற்று காரணமாக பெற்றோரை இழந்த பிள்ளைகளுக்கு முன்னுரிமை( கல்வி மற்றும் வேலைவாய்ப்பு)கொடுக்கும் தீர்மானமும் மேற்கொள்ளப்பட்டிருக்கிறது.

அடிக்குறிப்புகள்

[1] Economically Weaker Section - Wikipedia

[2] Telangana Releases Norms for EWS Quota, 33% Reservation for Women in Govt Posts